• Արմեն Պետրոսյան
  • Հատկապես իսլամական ծայրահեղականներից ուղղակի ահաբեկչական սպառնալիք Հայաստանի համար չկա։ Մենք, առաջին հերթին, չունենք մեր երկրի քաղաքացիներ, որոնք հանդես են գալիս մերձավորարևելյան իրադարձություններում, և նրանց վերադարձը կարող է սպառնալիք հանդիսանալ, ինչպես, օրինակ՝ եվրոպական և մեր հարևան որոշ երկրների պարագայում է։ Հաջորդը՝ ՀՀ-ն չունենալով մուսուլմանական ազգաբնակչություն՝ այս առումով ևս բավականաչափ ապահովագրված վիճակում է գտնվում, քանի որ տարբեր երկրներում բնակվող մուսուլման ազգաբնակչության շրջանում են տարածվում նման ծայրահեղական գաղափարները. մինչդեռ անմիջական սպառնալիքի տակ առավելապես գտնվում են Մերձավոր Արևելքի և արևմտյան երկրների հայ համայնքները՝ Կից նյութն՝ այստեղ Նյութի աղբյուր՝ https://www.facebook.com/armen.petrosyan.05/posts/1438408849529658 ...

    Կարդալ ավելին
  • Համաձայն Reuters լրատվական գործակալության հաշվարկների՝ միայն 2017թ. ընթացքում Սիրիայում զոհվել է առնվազն 40 ռուս զինծառայող. ՌԴ ՊՆ կողմից տրամադրված տեղեկատվության համաձայն՝ նույն ժամանակամիջոցում զոհված զինծառայողների թիվն ընդամենը 10 է: Բրիտանական լրատվամիջոցի կողմից հրապարակված տվյալներում մահվան յուրաքանչյուր դեպքը փաստարկվել է միաժամանակ մի քանի աղբյուրների կողմից: Եթե, այնուամենայնիվ, Reuters-ի հաշվարկները համապատասխանում են իրականությանն, ապա անցյալ 7 ամիսներին ռուսական կողմն ավելի շատ մարդկային կորուստներ է կրել, քան սիրիական հակամարտությանը ՌԴ օդատիեզերական ուժերի ուղղակի մասնակցության առաջին 15 ամիսների ընթացքում (09.2015-12.2016). նշված ժամանակահատվածում ռուսական կողմի մարդկային կորուստները կազմել են առնվազն 36 զինծառայող և սպա: Ընթացիկ տարվա ընթացքում ռուսական կորուստների այսօրինակ աճի միտումները կարելի է պայմանավորել սիրիական հակամարտությանը ՌԴ ներգրավվածության ձևաչափի էականորեն ընդլայնմամբ: Վերոնշյալի համատեքստում, նաև հաշվի առնելով սիրիական հիմնախնդրի շրջանակներում առկա իրողությունները և ուրվագծվող նոր միտումները, որոնցում անհերքելիորեն ընդլայնվելու են նաև Մոսկվայի դերակատարության ծավալները, միանշանակորեն կարելի է կանխատեսել ռուսական կողմի ինչպես նյութական, այնպես էլ մարդկային կորուստների որոշակի աճ: Նյութի աղբյուր՝ https://www.facebook.com/armen.petrosyan.05/posts/1419167504787126 ...

    Կարդալ ավելին
  • Լիբանանյան «Հիզբալլահ» շիայական արմատական կազմակերպության և «Ալ-Կաիդայի» սիրիական ճյուղավորման՝ «Ջաբհաթ ալ-Նուսրայի»(ՋՆ, ներկայում՝ «Հայաթ Թահրիր ալ-Շամ») միջև Լիբանանի հյուսիս արևելյան՝ Սիրիային սահմանակից Արսալ շրջանում արդեն մի քանի ամիս շարունակվող հակամարտությունը, կարծես, ավարտին է մոտենում. ՋՆ-ն շուրջ 6 տարի անց լքում է իր համար ռազմավարական մեծ կարևորություն ունեցող շրջանը: Հատկապես վերջին օրերին տեղի ունեցած արյունալի բախումների արդյունքում, որոնց ընթացքում ՋՆ-ի մարդկային կորուստններն անհամեմատելիորեն ավելի մեծաթիվ էին, կողմերի միջև կայացավ փոխհամաձայնություն, համաձայն որի՝ ահաբեկչական խմբավորման անդամներն իրենց ընտանիքներով լքելու են Արսալը՝ տեղափոխվելով Սիրիայի Իդլիբ նահանգ, որն արդեն գրեթե ամբողջովին վերահսկվում է ՋՆ-ի կողմից: Զուգահեռաբար, պայմանավորվածություններ են ձեռք բերվել նաև գերիների փոխանակման հարցում, ըստ որի՝ ՋՆ-ի ամեն խմբի՝ Արսալից դուրս գալու դիմաց գերությունից ազատվելու է «Հիզբալլահի» 1 զինյալ: Ըստ այդմ, որոշ տեղեկությունների համաձայն, 116 ավտոբուսներով և «Կարմիր մահիկի» ավտոշարասյան 17 ավտոմեքենաներով Արսալից Սիրիա է տեղափոխվում մոտ 7777 ծայրահեղական, նրանց ընտանիքի անդամներ և գաղափարակիցներ: Փաստորեն, ինչպես և սպասվում էր, «Հիզբալլահը» լրջագույնս ամրապնդում է սեփական դիրքերը նաև Լիբանանի սահմանակից շրջաններում՝ նման կերպ նախ ապահովելով մերձավորարևելյան այս երկրի սահմանների անվտանգությունը տարաբնույթ ծայրահեղական տարրերի ներթափանցումից, մյուս կողմից էլ առավել էական սպառնալիք ստեղծելով Լիբանանի արդեն հարավային հարևանի՝ Իսրայելի համար: Նյութի աղբյուր՝ https://www.facebook.com/armen.petrosyan.05/posts/1418415891528954 ...

    Կարդալ ավելին
  • «Նա, ով ապրում է ապակե պալատում, չպետք է քարեր նետի»... Իսրայելի ԱԳՆ-ի պատկերավոր, բայց շատ բնութագրական պատասխանն է Թուրքիայի նախագահ Ռ.Թ.Էրդողանին՝ Երուսաղեմի Ալ-Ակսա մզկիթի շուրջ ծավալվող գործընթացների հետ կապված իսրայելական իշխանությունների հասցեին չդադարող քննադատական հայտարարությունների առնչությամբ... Նյութի աղբյուր՝ https://www.facebook.com/armen.petrosyan.05/posts/1416558011714742 ...

    Կարդալ ավելին
  • Սիրիայից ստացվող վերջին տեղեկությունների համաձայն՝ այդ երկրի՝ հակակառավարական խմբավորումների կողմից ամբողջապես վերահսկվող միակ նահանգում՝ Իդլիբում, բավական վտանգավոր իրավիճակ է ստեղծվել. շրջանում բացարձակ առվելություն է հաստատել «Ալ-Կաիդայի» սիրիական ճյուղավորման՝ «Հայաթ Թահրիր ալ-Շամ»(ՀԹՇ, նախկինում՝ «Ջաբհաթ ալ-Նուսրա») գլխավորած տարաբնույթ խմբավորումների դաշինքը: Բանն այն է, որ հատկապես Հալեպի կորստից հետո՝ վերջին կես տարվա ընթացքում, Իդլիբը վերածվել էր հակակառավարական առանցքային տարաբնույթ խմբավորումների կարևորագույն որջի, որտեղ վերջնական դոմինանտության հասնելու համար արյունալի մարտերը չէին դադարում: Հիմնական պայքարն ընթանում էր ՀԹՇ-ի և սիրիական «չափավոր» ընդդիմադիր ամենազդեցիկ կառույցներից մեկը հանդիսացող «Ահրար ալ-Շամ»(ԱՇ) խմբավորման գլխավորած դաշինքների միջև. ռազմական գործողություններն ընթանում էին փոփոխական հաջողություններով, շատ կարճատև հրադադարներով՝ պայմանական ազդեցության գոտիների բաժանման եղանակով: Եվ ահա՝ ամենաթարմ տեղեկատվության համաձայն՝ ՀԹՇ-ն ջախջախիչ պարտության է մատնել ԱՇ-ին. ըստ սոցցանցերում շրջանառվող լուրերի՝ վերջինի շուրջ 13 հզ. զինյալներ անցել են հակառակորդի շարքերը: Անշուշտ, հնարավոր է՝ նշված թիվն ուռճացված է, սակայն եթե այն համապատասխանում է իրականությանը, ապա խոսքը գնում է ԱՇ-ի զինյալների ամբողջ թվի մոտ կեսի մասին: Մյուս կողմից, չափազանց կարևոր է փաստի նշանակությունը, քանի որ, ըստ էության, Իդլիբն ամբողջությամբ անցել է «ջիհադականների» վերահսկողության ներքո:  ՀԹՇ-ի հաջողության մի քանի պատճառ է նշվում՝ նախ խմբավորման զինյալների առավելությունը մարտունակության և ռազմատեխնիկայի առումով, ապա նաև այն, որ հակառակորդ դաշինքին հարող հիմնական խմբավորումները լոկալ բնույթի էին՝ ոչ ունակ արժանի դիմադություն ցուցաբերելու: Իդլիբում ստեղծված իրավիճակը որոշակիորեն բացասական ազդեցություն է ունենալու ինչպես ներսիրիական զարգացումների, այնպես էլ՝ նաև սիրիական հակամարտության կարգավորման քաղաքական գործընթացի վրա: Նախ ՀԹՇ-ն սիրիական հակամարտության ամենամարտունակ և անկանխատեսելի դերակատարներից է, և չեն բացառվում խմբավորման հետագա առաջխաղացման հնարավորությունները դեպի հարևան նահանգներ՝ հիմնականում Հալեպ և Լաթակիա: Մյուս կողմից, բացի Իդլիբից, Սիրիայի մյուս հատվածներում «չափավոր» ընդդիմադիր խմբավորումների կողմից վերահսկվող շրջաններն աշխարհագրական և ռազմավարական կարևորության տեսանկյունից խիստ աննշան են, ազդեցության գոտիները՝ հատվածային: Հաջորդ կարևոր իրողությունն այն է, որ ԱՇ-ն ամենաազդեցիկ ընդդիմադիր խմբավորումներից էր իր ներուժով և զբաղեցրած դիրքերով, որի քաղաքական թևը պարբերաբար մասնակցում էր սիրիական հիմնախնդրի կարգավորմանը նվիրված տարաբնույթ քաղաքական ձևաչափերին: Ստեղծված իրավիճակը լուրջ բարդությունների առաջ է կանգնեցնում նաև «չափավոր» ընդդիմության արտաքին հովանավորներին, քանի որ սահմանփակվում է մի կողմից Սիրիայի ներսում տարաբնույթ խմբավորումներին աջակցություն ցուցաբերելու հնարավորությունը, մյուս կողմից՝ քաղաքական կարգավորման գործընթացի շրջանակներում վարչակարգի հետ բանակցություններում համարժեքորեն սակարկության հնարավորությունները: Նյութի աղբյուր՝ https://www.facebook.com/armen.petrosyan.05/posts/1411884685515408 ...

    Կարդալ ավելին
  • Անցյալ 10 օրերի ընթացքում հերթական անգամ սրված իսրայելապաղեստինյան հակամարտության հիմնական թատերաբեմը Երուսաղեմի Հին քաղաքն էր, մասնավորապես՝ Տաճարի լեռը և Ալ-Ակսա մզկիթը, որը Մեքքայի և Մադինայի սրբատեղիներից հետո մուսուլմանների համար իր նշանակությամբ 3-րդ մզկիթն է: Տաճարի լեռան շուրջ ստեղծված ճգնաժամային իրավիճակը զգալիորեն ալեկոծել էր իսլամական աշխարհը՝ տարբեր երկրների պաշտոնական շրջանակների կողմից հնչած սպառնալից հայտարարություններ Իսրայել պետության իշխանությունների հասցեին, պաղեստինցիների ըմբոստությանն ուղղված աջակցության բազմաթիվ ակցիաներ, բողոքի գործողություններ և հարձակումներ հրեական տարաբնույթ կառույցների դեմ և այլն: Հանգամանալից կերպով ուսումնասիրելով Ալ-Ակսա մզկիթի հետ կապված զարգացումների նկատմամբ իսլամադավան երկրների իշխանությունների և ազգաբնակչության վերաբերմունքը՝ անհերքելիորեն պետք է նշել, որ և՛ պաշտոնական հայտարարությունների սրությամբ, և՛ հասարակական աջակցության մակարդակով Թուրքիան ակնհայտորեն գերազանցեց մյուս բոլոր՝ անգամ արաբական երկրներին՝ 1 տասնյակից ավելի հայտարարություններ նախագահից մինչև ԱԳ նախարարի մակարդակով, բողոքի ակցիաներ ավելի քան 8 տասնյակ թուրքական բնակավայրերում, հարձակումներ հրեական սինագոգերի, այդ թվում ստամբուլյան «Նևե Շալոմ» սինագոգի դեմ և այլն: Իսրայելի դիվանագիտական ներկայացուցչության աշխատակիցների կողմից վարձակալված բնակարանի դեմ տեղի ունեցած զինված հարձակման հետևանքով Հորդանանից հետո Թուրքիան մուսուլմանական եզակի երկին էր, որտեղ տեղակայված իսրայելական դիվանագիտական ներկայացուցչությունները անվտանգության նկատառումներով ժամանակավորապես փակվեցին: Այսպիսով, շուրջ 1,5 տասնամյակ Թուրքիայում իշխող ԱԶԿ-ի կառավարման գաղափարական ուղղություններից մեկը՝ կրոնականը, կարծես, տվել է իր արդյունքները՝ նաև զգալիորեն ամրանալով թուրք հասարակության շրջանում: Նյութի աղբյուր՝ https://www.facebook.com/armen.petrosyan.05/posts/1410968058940404 ...

    Կարդալ ավելին
  • Կարծես, մոտ է հանգուցալուծումը շուրջ 10 օր շարունակվող իսրայելապաղեստինյան ճգնաժամի սրացման նոր շրջափուլի, որի զարգացումները հիմնականում տեղի էին ունենում Երուսաղեմի Հին քաղաքում՝ Տաճարի լեռան շրջակայքում: Իսրայելի գործադիր մարմնի ռազմաքաղաքական կազմի՝ անցած գիշեր տեղի ունեցած տևական նիստի և քվեարկության արդյունքում որոշում է կայացվել ապամոնտաժել մետաղադետեկտորներն ու տեսախցիկները, որոնք տեղադրվել էին հուլիսի 14-ին նշված շրջանում տեղի ունեցած հարձակումից հետո, երբ սպանվել էին Իսրայելի սահմանային ոստիկանության 2 ծառայողներ: Հավատացյալ պաղեստինցիները 10 օր շարունակ տարաբնույթ բողոքի գործողություններ էին իրականացնում՝ պահանջելով վերացնել վերոնշյալ անվտանգության միջոցները և ապահովել ազատ մուտքը Ալ-Ակսա մզկիթ: Մեքքայի և Մադինայի սրբատեղիներից հետո մուսուլմանների համար իր նշանակությամբ 3-րդ մզկիթի շուրջ ստեղծված իրավիճակը որոշ չափով համախմբել էր նաև մուսուլմանական մի շարք երկրների: Իսրայելին թիրախավորած մեղադրական կոչերով են հանդես եկել Թուրքիայի, Իրանի, Եգիպտոսի, Սաուդյան Արաբիայի, Հորդանանի և այլ երկների ղեկավար շրջանակների ներկայացուցիչներ (բազմաթիվ մուսուլմանական երկրներում տեղի են ունեցել նաև պաղեստինցիների աջակցությանն ուղղված տարաբնույթ ակցիաներ), ԱՊԼ-ն, իսկ միջազգային առանցքային դերակատարների՝ ՄԱԿ-ի, ԱՄՆ-ի, ՌԴ-ի, ԵՄ-ի մոտեցումներում առավելապես գերակշռում էր բալանսավորված մոտեցումը: Ճգնաժամի հանգուցալուծմանը միտված բավական ակտիվ ստվերային միջնորդական գործունեություն էին ծավալել ԱՄՆ-ն, Հորդանանը և Սաուդյան Արաբիան: Պաղեստինցի արաբների ամենօրյա բողոքի գործողությունները տեղի էին ունենում ոչ միայն բուն Երուսաղեմի Հին քաղաքում, այլև Իսրայելի, ինչպես նաև՝ ՊԻ-ի մի շարք բնակավայրերում՝ բարձրացնելով ինչպես ահաբեկչական նոր սպառնալիքի հնարավորությունը, այնպես էլ՝ առավել լայնամասշտաբ բախումների՝ ընդհուպ «ինթիֆադայի» (ապստամբություն) հավանականությունը. նշված բողոքի ակցիաների և տարաբնույթ հարձակումների հետևանքով անցյալ 10 օրերի ընթացքում երկու կողմից գրանցվել է շուրջ 1 տասնյակ զոհ, հարյուրավոր վիրավորներ: Ընդ որում՝ բախումները դուրս են եկել բուն Պաղեստինի տարածքից՝ հասնելով նաև Հորդանան: Մասնավորապես, հուլիսի 23-ին հարձակում է տեղի ունեցել Հորդանանում Իսրայելի դիվանագիտական ներկայացուցչության աշխատակիցների կողմից վարձակալված բնակարանի դեմ: 17-ամյա արաբը մարմնական վիրավորում էր հասցրել հրեա անվտանգության ծառայողին, իսկ վերջինի պատասխան կրակից սպանվել են «ահաբեկիչը» և բնակարանի տերը՝ հորդանանցի բժիշկ: Այս միջադեպի հետևանքով Հորդանանի իշխանություններն արգելափակել էին Ամմանում իսրայելական դեսպանության շուրջ 3 տասնյակ աշխատակիցներին, այդ թվում նաև՝ վերոնշյալ անվտանգության ծառայողին, ում դեմ թագավորության իշխանությունները հայտարարել էին քրեական հետապնդում՝ ահաբեկչություն իրականացնելու մտադրության համար: Հատկապես Ամանում տեղի ունեցած միջադեպից, նաև դրա հետևանքով առավել մեծացած միջազգային ճնշումներից հետո, ինչպես նաև շատ ավելի մասշտաբային բախումներից խուսափելու համար իսրայելական կողմը որոշեց գնալ փոխզիջման՝ դադարեցնել վերոնշյալ անվտանգային միջոցառումները՝ փոխարինելով դրանք ընդամենը «խելացի տեսախցիկներով», ինչի դիմաց Հորդանանի իշխանությունները թույլատրեցին Իսրայել վերադառնալ Ամմանում տեղակայված դիվանագիտական ներկայացուցչության ողջ անձնակազմին, այդ թվում նաև՝ անվտանգության աշխատակցին: Անշուշտ, վերոնշյալ փոխզիջումային քայլերը, մեծ հավանականությամբ, կմեղմեն Երուսաղեմում ստեղծված պայթյունավտանգ իրավիճակը, բայց նաև վերջին սրացումները հերթական անգամ ցույց տվեցին, որ մինչ այս հնչած գնահատականները՝ մերձավորարևելյան ամենատևական և արյունալի հակամարտության իսրայելապաղեստինյան բաղադրիչի՝ վտանգավորության աստիճանի նվազման մասին անհեռատես էին. կասկածից վեր է՝այս քնած հրաբուխը կարող է հերթական անգամ ժայթքել ցանկացած պատեհ և անկանխատեսելի առիթի դեպքում՝ անկանխատեսելի մասշտաբներով ալեկոծելով ողջ տարածաշրջանը: Նյութի աղբյուր՝ https://www.facebook.com/armen.petrosyan.05/posts/1410148492355694 ...

    Կարդալ ավելին
  • Դիցուք, պատկերացնենք հետևյալ իրավիճակը. ենթադրենք, օրվա աշխատանքային ժամերին (չի բացառվում նաև հենց աշխատավայրում) նախագահ Ալիևը պահանջում է կնոջից՝ ընտանեկան պարտականությունների կատարում: Նման իրավիճակը, մեկ այլ տեսանկյունից, արդյո՞ք չի կարելի մեկնաբանել նաև՝ որպես ենթակայի նկատմամբ սեռական ոտնձգության իրականացում: Ասածս ինչ է՝ եթե Ի. Ալիևը հրատապ կերպով աշխատանքային ու քրեական օրենսգրքերոում համապատասխան փոփոխություններ չանի, վաղը մյուս օր «բանը բուրդ է լինելու»: Նյութի աղբյուր՝ https://www.facebook.com/armen.petrosyan.05/posts/1405130996190777 ...

    Կարդալ ավելին
  • Մեքենայի ղեկին զուգահեռաբար ժամանակակից smartphone-ների ընձեռած տարբեր ծառայություններից օգտվելու և շեղվելու պատճառով վթարների դեպքեր գրանցվել են բազմիցս: Իսկ վերջերս հատկապես Facebook-ի «ուղիղ եթերն» է դարձել մերօրյա երիտասարդության շրջանում ամենատարածված ու նորաձև զվարճանքներից մեկը: Մինչդեռ սեփական կյանքի առանձին դրվագները պատեհ-անպատեհ «անմիջապես» ի ցույց դնելու անհաղթահարելի սովորությունը, ինչպես ցանկացած մոլուցք, հղի է նաև ամենածանր հետևանքներով, ինչպես՝ տվյալ դեպքում: Չեխիայում 120կմ/ժ արագությամբ ընթացող երկու աղջիկներ, որոնք իրենց ընթացքով կիսվում էին Facebook-ի «ուղիղ եթերում», բախվել են ճանապարհի արգելապատնեշին, ուղևորը մահացել է տեղում, վարորդի վիճակը ծայրահեղ ծանր է... Նյութի աղբյուր՝ https://www.facebook.com/armen.petrosyan.05/posts/1395109413859602 ...

    Կարդալ ավելին
  • Հերթական ահասարսուռ տեսանյութն է տարածվել Սիրիայից՝ «Իսլամական պետություն» ահաբեկչական խմբավորման ձեռագիրը պարունակող տեսարաններով, բայց ոչ այդ կառույցի զինյալների մասնակցությամբ: Տեսանյութը, հավանաբար, նկարահանվել է Սիրիայի հյուսիսում, դրանում պատկերված են սիրիական «Քրդական ինքնապաշտպանական ջոկատների» (YPG) բանակային համազգեստով հանդերձավորված, դաժանաբար սպանված զինյալներ, որոնց գլխատված դիերը բռնության են ենթարկվում թուրքերենով ազատ հաղորդակցվող, դիմակավորված անձանց կողմից: Նաև տեսանյութի մեկնաբանություններում հնչած կարծիքների համաձայն, ամենայն հավանականությամբ, բռնությունն իրականացնող անձինք Սիրիայում YPG-ի դեմ պայքարող թուրքական հատուկ ծառայությունների աշխատակիցներ են կամ թուրքական բանակի զինծառայողներ: Չի բացառվում նաև թուրքական իշխանությունների հովանու ներքո գտնվող որևէ ծայրահեղական խմբավորման հետ առնչվող վարձկանների տարբերակը: Վերոնշյալի համատեքստում, հերթական անգամ ապացուցվում է այն իրողությունը, որ որևէ էթնիկ կամ կրոնական խմբի, տվյալ դեպքում՝ քրդերի դեմ, ամենավայրագ գործելաոճ ցուցաբերելը թուրքերի բնույթին համապատասխան վարվելակերպ է, որի հերթական դրսևորման համար նպաստող հանգամանք է դարձել քրդերի հանդեպ վերջին շրջանում բավական բարձր աստիճանի հասած թշնամանքը: Հ.Գ. Անմարդկային դաժանություններ պարունակող տեսանյութը ենթակա չէ հրապարակման: Նյութի աղբյուր՝ https://www.facebook.com/armen.petrosyan.05/posts/1394446097259267 ...

    Կարդալ ավելին
Загрузка...

ՖԲՀ

Քաղաքականություն