• Արմեն Պետրոսյան
  • Սիրիայի նախագահի կնոջ՝ Ասմա ալ-Ասադի մոտ կրծքագեղձի չարորակ ուռուցք է հայտնաբերվել: Հիվանդությունը կանխորոշվել է առաջին փուլում, և Սիրիայի առաջին տիկինն արդենիսկ սկսել է անհրաժեշտ բուժում ստանալ:Իսկ ալ-Ասադ ամուսիններն,ինչպես նախկինում, միասին են հաղթահարում հերթական՝այս անգամ իրենց ընտանիքին պատուհասած փորձությունը... Նյութի աղբյուր՝ https://www.facebook.com/armen.petrosyan.05/posts/1793494450687761 ...

    Կարդալ ավելին
  • Իսրայելի լուսավորության նախարարությունը 1,5 տարվա ակտիվ քննարկումներից հետո ուշագրավ փոփոխություններ է նախաձեռնել տարրական և միջին դպրոցներում, համաձայն որոնց՝ առաջարկվում է դպրոցականներին(մինչև 6-րդ դասարանը ներառյալ) ազատել տնային առաջադրանքներից, փոխարենը՝ նրանց տրամադրել ընթերցանության և մի շարք այլ արդիական զբաղմունքների: Վերոնշյալի առնչությամբ Իսրայելի կրթության ոլորտի մասնագետների հիմնավորումներում նշվում է, որ չափից ավելի ծանրաբեռնվածությունը միայն նվազեցնում է երեխաների ձգտումն ուսման նկատմամբ և հանգեցնում հավելյալ լարվածության: Բացի այդ, տնային առաջադրանքները հաճախ կոնֆլիկտային իրավիճակ են առաջացնում ծնողների և երեխաների միջև: Մասնագետների մյուս կարևոր հիմնավորումը վերաբերում է մանկավարժների անբարեխիղճ գործունեությանը, որոնք իրենց կողմից չմատուցված նյութը հաճախ հանձնարարում են աշակերտներին՝ տնային հանձնարարությունների տեսքով: Որպես այլընտրանք՝ մասնագետներն առաջարկում են աշակերտներն հանձնարարել տնային ընթերցանություն՝ օրական առնվազն 10 րոպե կտրվածքով, տարաբնույթ տրամաբանական, լեզվական, նաև համակարգչային խաղեր, բջջային հեռախոսներով պարտադիր լուսանկարման առաջադրանքներ՝ համապատասխան խորագրերով և այլն:  Իսկ այն ուսուցիչներից, ովքեր, այնուամենայնիվ, անհրաժեշտություն են համարում տնային հանձնարարությունները, պահանջվում է, որպեսզի դրանց ծավալը չգերազանցի 30 րոպե ժամանակահատվածը: Անգամ միայն մակերեսորեն ծանոթանալով առաջարկվող փոփոխություններին՝ կարելի հանգել այն համոզմունքին, որ դրանք, իրոք, բավական արդյունավետ կարող են լինել՝արդի աշխարհին համապատասխան հատկանիշներ և ունակություններ ունեցող սերունդներ դաստիարակելու համար: Նյութի աղբյուր՝ https://www.facebook.com/armen.petrosyan.05/posts/1782201921817014 ...

    Կարդալ ավելին
  • Իսրայելի վարչապետ Բ. Նեթանյահուի վարչապետության ընթացիկ՝ արդեն չորրոդ շրջանն աչքի է ընկնում երկրի ղեկավարի դեմ առավել լայն ծավալով իրականացվող տարաբնույթ գործընթացներով: Ներկայումս իրավապահ մարմինների քննության տարբեր մակարդակներում են գտնվում վարչապետի և նրա ընտանիքի անդամների դեմ հարուցված, կոռուպցիոն մեղադրանքներ պարունակող 4 տարբեր քրեական գործեր («1000-ի», «2000-ի», «3000-ի» և «4000-ի» գործերը), շարունակվում է ԶԼՄ-ների կողմից երկրի ղեկավարի գործունեության նկատմամբ ընդգծված անտարբերությունը, չեն դադարում Նեթանյահուի և նրա հարազատների հետ կապված տարբեր վաղեմության սկանդալների վերաբերյալ փաստերի վերհանումն ու ակտիվ շրջանառումը: Վերոնշյալի համատեքստում վերջին 2 աղմկահարույց միջադեպերը կապված են Նեթանյահուի որդու և կնոջ հետ: Տարեսկզբին իսրայելական ԶԼՄ-ներն ակտիվորեն տարածեցին վարչապետի «խնդրահարույց որդու»՝ Յաիր Նեթանյահուի սկանդալային ձայնագրությունն՝ արված դեռևս 2015 թ. նրա վարորդի կողմից: Դեպքը տեղի էր ունեցել Երուսաղեմի ստրիպտիզ ակումբներից մեկից դուրս գալիս, երբ Իսրայելի գազային մագնատներից մեկի՝ Քոբի Մայմոնի որդին և նրանց ընկերներից ևս մեկը Յ. Նեթանյահուից 25 հազար շեկել էին պահանջել (մոտ 7500 դոլար)՝ հիշեցնելով նաև, որ ակումբում ծախսել են 2400 շեկել, որից 400-ը միայն վարչապետի որդու պատվիրած պարուհու համար: Ի պատասխան՝ կրտսեր Նեթանյահուն բղավել է, թե․ «Հայրս քեզ 25 մլն շեկելի «լավություն է արել», իսկ դու 400 շեկել չե՞ս ուզում ինձ տալ»: Այս ձայնագրությունը մեծ աղմուկ էր բարձրացրել իսրայելական լրատվադաշտում և հասարակության շրջանում, և քննադատության սլաքներն ուղղվել են վարչապետի դեմ, ով իբր աջակցել է Մայմոնին՝ Իսրայելում հայտնի «Գազային գործարքի» շրջանակներում պատկառելի մասնաբաժին ձեռք բերելու հարցում: Հաջորդ սկանդալը վարչապետի կնոջ՝ Սառայի և Նեթանյահու ընտանիքի մամուլի հետ կապերի հարցով խորհրդականի միջև 2009 թ. տեղի ունեցած հեռախոսազրույցի հրապարակումն է, որտեղ Սառան բարձր տոնով բաղավում է՝ նշելով, թե ինքը ոչ միայն վարչապետի կինն է, այլ նաև հոգեբան՝ բակալավր և մագիստրոս: Բ. Նեթանյահուն վերոնշյալ 2 միջադեպերն էլ հասարակության համար առավել հանգամանորեն անդրադարձել է իր ֆեյսբուքյան էջում հրապարակված տեսագրությունների միջոցով, քանի որ ԶԼՄ-ները որևէ ուշադրություն չեն դարձրել վարչապետի պարզաբանման այլ փորձերին: Վերոնշյալն իր հերթին ևս առավել ցայտուն կերպով ցույց է տալիս Իսրայելի ներքաղաքական կյանքում առկա պատկերը: Չնայած Իսրայել պետության թե՛ ներքին, թե՛ արտաքին քաղաքականության ոլորտներում, տնտեսական կյանքում արձանագրած հաջողություններին, այսուհանդերձ հարկ է նշել, որ Նեթանյահուի անձի հանդեպ հասարակական, քաղաքական վերաբերմունքը խիստ հակասական է: Եթե հատկապես քաղաքական, ներկուսակցական և լրատվական դաշտում կարծիքները հիմնականում դեմ են՝ նաև նոր քաղաքական դեմքերի անհրաժեշտության հիմնավորմամբ, ապա հասարակության շրջանում մոտեցումն այլ է: Տարբեր սոցիոլոգիական կառույցների կողմից անցկացված հարցումների արդյունքում, եթե վարչապետի գլխավորած «Լիքուդ» կուսակցությունը կորցնում է դիրքերը, ապա իսրայելցի ընտրողը երկրի համար բավական կարևոր պատմական ժամանակաշրջանում Իսրայելը ղեկավարելու առավել համապատասխան, հավասարը չունեցող թեկնածու, քան Նեթանյահուն է, չի տեսնում: Նյութի աղբյուր՝ https://www.facebook.com/armen.petrosyan.05/posts/1583017788402096 ...

    Կարդալ ավելին
  • Օրերս ՄԱԿ-ում Իսրայելի մշտական ներկայացուցիչ Դանի Դանոնը ՄԱԿ-ի ԱԽ-ի հատուկ նիստին հրապարակել է իսրայելական հատուկ ծառայությունների տրամադրած հետախուզական տվյալները՝ «Սիրիան աշխարհի մեծագույն ռազմաբազայի վերածելու Իրանի փորձերի վերաբերյալ»: Իսրայելի կողմից բացահայտված «գաղտնի տեղեկությունների» համաձայն՝ ներկայում Սիրիայում գործում են ԻԻՀ ենթակայության ներքո գտնվող շուրջ 82 հազ. զինյալներ, այդ թվում՝ «Իսլամական հեղափոխության պահապանների կորպուսի» 3 հազար անդամներ, լիբանանյան «Հիզբալլահի» 9 հազար մարտիկներ, շիայական աշխարհազորի մոտ 10 հազար զինյալներ՝ հավաքագրված ամբողջ տարածաշրջանից, ինչպես նաև՝ շուրջ 60 հազար սիրիացիներ: Իսրայելի մշտական ներկայացուցչի հավաստմամբ՝ Իրանը Սիրիայի տարբեր շրջաններում կառուցում է ռազմաբազաներ՝ նշված խմբավորումներին տեղակայելու նպատակով, ինչպես նաև՝ հրթիռարտադրության համար նախատեսված գործարաններ՝ դրանց շրջակայքում եղած բնակչությանը վերածելով կենդանի վահանի:  Բացի այդ, 2015 թ. Միջուկային համաձայնագրի ստորագրումից հետո Իրանը միայն ավելացրել է իր ռազմական ծախսերը: Այսպես, եթե 2014 թ. Ռազմական ոլորտի ծախսերին էր ուղղվում ԻԻՀ ՀՆԱ-ի 17%-ը, ապա 2017 թ.՝ արդեն 22%-ը: Այն իրողությունը, որ սիրիական հակամարտության շրջանակներում Իսլամական հանրապետության դերակատարությունը բավական ծանրակշիռ է, և, որ 2011-2015 թթ. ՝ մինչև ՌԴ ուղղակի ռազմական միջամտությունը, Բաշար ալ-Ասադի վարչակարգը կարողացավ պահպանել իր գոյությունը և ձախողել բոլոր արտաքին դերակատարների ծրագրերը Սիրիայում, մեծամասամբ Թեհրանի համակողմանի աջակցությամբ, որևէ կասկած չի հարուցում: Ուստի, եթե նաև հաշվի առնենք քարոզչական բաղադրիչի էական բաժինը Իսրայելի կողմից ներկայացված զեկույցում, այսուհանդերձ, անգամ հրապարակված տվյալների 50 %-անոց ճշգրտության պայմաններում Իրանի ներկայությունը Սիրիայում բավական ազդեցիկ է: Հետևաբար, նաև վերոնշյալի համատեքստում Սիրիայում ներկայում ծավալվող և կանխատեսվող գործընթացներում Իրանի շահերի անտեսումը կնշանակի հիմնախնդրի հանգուցալուծման գործընթացի ուղղակի խոչընդոտում, իսկ հակամարտության հետագա ձգձգումը՝ անհերքելիորեն Սիրիայի տարածքում Թեհրանի դիրքերի ավելի ամրապնդում, որի հետևանքները նրա՝ հատկապես տարածաշրջանային հակառակորդների համար կենսական նշանակության են: Նյութի աղբյուր՝ https://www.facebook.com/armen.petrosyan.05/posts/1581056238598251 ...

    Կարդալ ավելին
  • Թուրքական ԶՈւ-ի և նրանց հովանավորյալ սիրիական ընդդիմադիր խմբավորումների կողմից Սիրիայի Աֆրին տարածաշրջանում իրականացվող ռազմագործողութան շրջանակներում, բացի բուն ռազմական բախումներից, լայն թափ է ստանում նաև քարոզչական պատերազմը:  Մասնավորապես՝ մի շարք սիրիական լրատվամիջոցների հաղորդմամբ՝ Թուրքիան ակտիվացրել է ավիահարվածները Հալեպի հյուսիսային հատվածում: Իսկ Աֆրինի ծայրամասերի ռմբակոծության ընթացքում տուժել են նաև ամերիկացի ռազմական հրահանգիչներ, որոնք այդ ժամանակահատվածում մասնագիտական աջակցություն էին ցուցաբերում քրդական ուժերին. տեղեկատվության համաձայն՝ ամերիկացի մասնագետներից երկուսը զոհվել են: Պենտագոնը դեռևս չի արձագանքել նշված տեղեկատվությանը: Նյութի աղբյուր՝ https://www.facebook.com/armen.petrosyan.05/posts/1576601882377020 ...

    Կարդալ ավելին
  • Դիրքային իրավիճակը Սիրիայի հյուսիս-արևմուտքում և թուրքական ԶՈՒ-երի ու մի շարք սիրիական ընդդիմադիր խմբավորումների կողմից հունվարի 20-ին՝ ժամը 17:00-ից պաշտոնապես մեկնարկած «Ձիթենու ճյուղ» ռազմագործողության առաջին օրվա արդյունքները քարտեզանշման տեսքով 1. Առաջին քարտեզում պատկերված է Սիրիայի տարածքի հյուսիս-արևմուտյան հատվածում՝ վերջին թեժ ռազմագործողությունների թատերաբեմում ստեղծված բավական խայտաբղետ ընդհանուր դիրքային դասավորվածությունը, որտեղ դեղինով գծանշված են քրդական «SDF», «YPG» և այլ կառույցների, բաց կանաչով՝ թուրքական ԶՈՒ-երի ու նրանց հարող սիրիական ընդդիմադիր խմբավորումների, մուգ կանաչով՝ ահաբեկչական «Հայա Թահրիր ալ-Շամի»(Ալ-Կաիդա) և նրա դաշնակից խմբավորումների, կարմիրով՝ սիրիական կառավարական ուժերի զբաղեցրած դիրքերը: 2. Երկրորդ քարտեզում ներկայացված է «Ձիթենու ճյուղ» ռազմագործողության առաջին օրվա արդյունքները, թուրքական կողմի առաջխաղացման ուղղությունները: Նյութի աղբյուր՝ https://www.facebook.com/armen.petrosyan.05/posts/1574196715950870?notif_id=1516601170605444¬if_t=close_friend_activity&ref=notif ...

    Կարդալ ավելին
  • Ըստ ՌԴ պաշտպանության նախարար Սերգեյ Շոյգուի՝ Սիրիայում իրականացված ռազմական գործողության ընթացքում ՌԴ օդատիեզերական ուժերի միավորներն իրականացրել են ավելի քան 34 հազ. մարտական թռիչք, ռազմանավերից և սուզանավերից հասցվել է 100 հարված, կատարվել են նաև այլ գործողություններ. ընդհանուր առմամբ, ռազմագործողությամը մասնակցել է ավելի քան 48 հազ. ռուսաստանցի զինծառայող: Ռազմագործողության արդյունքում սպանվել է 60 հազ. 318 զինյալ, այդ թվում՝ 2840 ռուսաստանցի, տարաբնույթ խմբավորումների 819 առաջնորդներ, խոցվել է ավելի քան 8000 զրահամեքենա, 718 զենքի արտադրամաս և արհեստանոց: Ռուս սակրավորները վնասազերծել են 6533 հա տարածք, 1410 կմ ավտոճանապարհ, 17138 շինություն, ոչնչացրել 105054 պայթուցիկ սարքավորում:  Ինչ խոսք, բավական տպավորիչ արդյունքներ են, մինչդեռ դրանց արդյունավետությունն ավելի չափելի կլինի այն դեպքում, երբ պաշտոնական տվյալներ հայտարարվեն նաև ռուսական կողմի մարտական կորուստների և ֆինանսական ծախսերի վերաբերյալ... Նյութի աղբյուր՝ https://web.facebook.com/armen.petrosyan.05/posts/1546745845362624 ...

    Կարդալ ավելին
  • Մերձավորարևելյան թեմատիկայով նախօրեին տարածված ամենասենսացիոն տեղեկատվությունը դարձյալ կապված է #ՍաուդյանԱրաբիայի հետ. թագավորության դիվանագիտության պատմության ողջ ընթացքում Սաուդյան Արաբիայում նշանակվել է առաջին կին դեսպանը:  Բելգիայի ԱԳ նախարար Դիդյե Ռեյնդերսը հաստատել է Դոմինիկ Միների նշանակումը Սաուդյան Արաբիայում Բելգիայի արտակարգ և լիազոր դեսպանի պաշտոնում, ով, սակայն, իր դիվանագիտական պարտավորությունները ստանձնելու է միայն 2018 թ. ամռանը: Նյութի աղբյուր՝ https://www.facebook.com/armen.petrosyan.05/posts/1542973579073184 ...

    Կարդալ ավելին
  • Դեկտեմբերի 6-ին ԱՄՆ-ի նախագահ Դոնալդ Թրամփը հանդես է եկել Երուսաղեմի կարգավիճակի վերաբերյալ հատուկ հայտարարությամբ՝ ճանաչելով այն Իսրայելի մայրաքաղաք և հրահանգել Պետդեպին՝ նախաձեռնել Թել Ավիվում տեղակայված ԱՄՆ-ի դեսպանատունը Երուսաղեմ տեղափոխելու գործընթացը: Ամերիկյան դեսպանատունը Երուսաղեմ տեղափոխելու վերաբերյալ օրենքն ամերիկյան Կոնգրեսն ընդունել էր դեռևս 1995 թ.. փաստաթուղթը նաև հնարավորություն էր ընձեռում նախագահներին՝ հետաձգել դեսպանատան տեղափոխումը, ինչից էլ, ըստ էության, յուրաքանչյուր կես տարի օգտվել են Թրամփին նախորդած նախագահները:  Ընդհանուր առմամբ, Թրամփի կողմից հնչեցված հայտարարության տեքստում նշվում է նաև, որ Երուսաղեմի վերաբերյալ տվյալ որոշումը որևէ առնչություն չունի քաղաքի վերջնական կարգավիճակի և սահմանների որոշման հարցերի հետ, որոնք կարգավորվելու են բացառապես հակամարտ կողմերի՝ Իսրայել պետության և Պաղեստինյան ինքնավարության միջև անմիջական բանակցությունների արդյունքում: Մինչդեռ հայտարարության մեջ տեղ գտած այս վերջին՝ բավական կարևոր ձևակերպումը ռացիոնալ դաշտում, կարծես թե, այդպես էլ արժանի գնահատականի չարժանացավ, անգամ անտեսվեց, քանի որ Երուսաղեմի խնդիրը, հաշվի առնելով քաղաքի կրոնական նշանակությունը, մշտապես դիտարկվել է առավելապես զգացական հարթությունում: Այս է պատճառը, որ ԱՄՆ-ի վարչակազմի նոր մոտեցումները պաղեստինաիսրայելական հիմնախնդրի և նրա առանցքային բաղադրիչներից մեկը հանդիսացող Երուսաղեմի վերաբերյալ, կարող են հանգեցնել տարաբնույթ բացասական հետևանքների, որոնց հնարավոր դրսևորումները կարելի է դասակարգել հետևյալ պայմանական հաջորդականությամբ՝ 1. Դ. Թրամփի հայտարարությունն «ամբողջական» Երուսաղեմի վերաբերյալ որոշակի իրավական հակասություններ է առաջացնում քաղաքի կարգավիճակի վերաբերյալ առկա միջազգային մի շարք բանաձևերի, մասնավորապես՝ 1947 թ. նոյեմբերի 29-ին ընդունված ՄԱԿ-ի ԳԱ № 181 (II) բանաձևի, որը հռչակում էր Երուսաղեմի հատուկ կարգավիճակն, ինչպես նաև՝ ՄԱԿ-ի ԱԽ-ի կողմից 1980 թ. օգոստոսի 20-ին ընդունված № 478 բանաձևի հետ. վերջին փաստաթուղթն էլ մերժում է Իսրայելի Կնեսեթի կողմից նույն թ. հուլիսին ընդունված Երուսաղեմի վերաբերյալ «Հատուկ օրենքը», ինչի միջոցով փաստացի բռնակցվում էր քաղաքի արևելյան հատվածը, որը նախատեսվում էր հռչակել Պաղեստին պետության մայրաքաղաք՝ դրա ստեղծման դեպքում: Նշվածներից բացի, Դ. Թրամփի որոշումը չի համապատասխանում նաև ՄԱԿ-ի ԳԱ-ի մի շարք այլ բանաձևերին, որոնք, սակայն, պարտադիր կատարման պահանջ չունեն: 2. Երուսաղեմի վերաբերյալ վերոնշյալ որոշումը ևս կարելի է տեղավորել արտաքին և ներքին բազմաթիվ խնդիրների առնչությամբ նախորդ վարչակազմերի քաղաքական ուղեգծերից տարբերվելու Թրամփի մերձավոր շրջապատի մոտեցման տրամաբանության մեջ: Ընդ որում, հաշվի առնելով նման քայլի հնարավոր բազմակողմանի բացասական հետևանքները, կարելի է կանխատեսել, որ նշված որոշումը կայացվել է ԱՄՆ-ի արտաքին քաղաքականության պատասխանատու պաշտոնյաների նեղ խմբի կողմից, ում վրա էական է հրեական լոբբիի ազդեցությունը: 3. ԱՄՆ-ի նախագահի որոշումը էականորեն վնասելու է Վաշինգթոնի հեղինակությանը մերձավորարևելյան տարածաշրջանում, արաբական և մուսուլմանական երկրների հետ հարաբերություններում, ինչպես նաև, իր բնույթով լինելով միակողմանի փաստաթուղթ, զգալիորեն սասանելու է ԱՄՆ-ի՝ որպես պաղեստինաիսրայելական հիմնախնդրի կարգավորման միջնորդ «Քառյակի» առանցքային դերակատարի դիրքերը: 4. Երուսաղեմի վերաբերյալ որոշումը հավելյալ լարվածություն է առաջացնելու առանց այն էլ քաոսային իրավիճակում գտնվող Մերձավոր Արևելքում՝ հերթական անգամ բորբոքելով տարածաշրջանի հանգուցային հիմնախնդիրներից մեկը, որի ուղղակի հետևանքներն արդեն իսկ իրենց զգացնել են տալիս Իսրայելի տարբեր շրջաններում: 5. Նոր սրացումները կարող են դրսևորվել տարաբնույթ անկարգություններից մինչև պաղեստինցիների հերթական՝ արդեն երրորդ ապստամբության (ինթիֆադայի) տեսքով, որոնք կարող են տեղի ունենալ ոչ միայն Իսրայելի տարածքում: 6. Միջազգային հարաբերությունների համատեքստում՝ ստեղծված իրավիճակը կարող է լուրջ բարդություններ առաջացնել ինչպես մուսուլմանական, այնպես էլ բազմաթիվ այլ, նաև արևմտյան երկրների և Իսրայելի, ԱՄՆ-ի միջև հարաբերություններում, որոնք կդրսևորվեն հիմնականում հռետորաբանական և դիվանագիտական հարթություններում հնարավոր տարաբնույթ զարգացումներում: Հ.Գ. Ինչ խոսք, ԱՄՆ-ի նախագահի որոշումը Երուսաղեմի վերաբերյալ, որը փաստացի արձնագրում է Իսրայելի մայրաքաղաքի ճանաչման գործընթացի մեկնարկը, կարող է շղթայական ռեակցիայի էֆեկտով որոշակի ազդեցություն ունենալ նաև Վաշինգթոնի էական ազդեցության ներքո գտնվող մի շարք այլ երկրների դիրքորոշման վրա՝ ընդ որում, տարբեր տարածաշրջաններում. այդուհանդերձ, միջազգային հանրության կողմից ճանաչված Իսրայելի մայրաքաղաքը շարունակելու է համարվել Թել Ավիվը, քանի դեռ վերջնականապես չի կարգավորվել պաղեստինաիսրայելական հիմնախնդիրը: Նյութի աղբյուր՝ https://www.facebook.com/armen.petrosyan.05/posts/1532362763467599 ...

    Կարդալ ավելին
  • Համաձայն Speedtest Global Index-ի ամենամսյա տվյալների՝ աշխարհում ամենաարագ ֆիքսված ինտերնետային կապ ունեցող երկրներն են՝ 1. Սինգապուր (148.62 Մգբ/վ) 2. Հոնգ Կոնգ (137.40) 3. Իսլանդիա (134.80) 4. Հարավային Կորեա (108.89) 5. Ռումինիա (97.70) 6. Նիդերլանդներ (87.04) 7. Մակաու (86.37) 8. Շվեդիա-1 (79.06) 9. Շվեյցարիա (77.24) 10. Հունգարիա (76.99): Հայաստանը զբաղեցրել է վարկանիշային դասակարգման 68-րդ հորիզոնականը (20.45 Մգբ/վ)` առաջ անցնելով հարևան երկրներից, Վրաստանը 71-րդ տեղում է (19.31), Թուրքիան` 84-րդում (15.78), Ադրբեջանը՝ 104-րդում (10.23), Իրանը՝ 105-րդ հորիզոնականում (10.02): ԱՄՆ-ն դասակարգման 11-րդ տեղում է (74.68), Ռուսաստանը՝ 39-րդում (36.61), իսկ ցուցակը եզրափակում է Լիբիան 134-րդ հորիզոնականում (3.43): Շարժական կապի տեսանկյունից՝ ամենաարագ համացանցն ունեցող երկրների առաջատար տասնյակը հետևյալ տեսքն ունի՝ 1. Նորվեգիա (59.40 Մգբ/վ) 2. Իսլանդիա (58.35) 3. Նիդերլանդներ (51.99) 4. Մալթա (50.79) 5. Սինգապուր (49.86) 6. Հունգարիա (47.98) 7. Ավստրալիա (47.49) 8. ԱՄԷ (46.04) 9. Լյուքսեմբուրգ (43.21) 10. Դանիա (41.93): Այս դասակարգման մեջ Հայաստանը զբաղեցրել է 56-րդ հորիզոնականը (20.15 Մգբ/վ)` հարևան երկրներից զիջելով Թուրքիային (33-րդ տեղ, 30.01), Ադրբեջանին (53-րդ տեղ, 20.99), Վրաստանին (54-րդ տեղ, 20.82): Իրանը զբաղեցրել է 67-րդ հորիզոնականը (16.30), ԱՄՆ-ն ՝ 47-րդը (25.16), Ռուսաստանը՝ 73-րդ տեղը (15.59), իսկ ամենաթույլ բջջային ինտերնետ ունեցող երկիրն է Իրաքը (122-րդ տեղ,3.45 Մգբ/վ): Նյութի աղբյուր՝ https://www.facebook.com/armen.petrosyan.05/posts/1516275728409636 ...

    Կարդալ ավելին

ՖԲՀ

Քաղաքականություն